سابع بكرة

الحقد .. 

من فينا مهما كان في منتهى الطيبة .. مش بيحقد ؟!

بنحقد على الناس لأي سبب .. ممكن عشان بنحس إنهم أفضل مننا .. او فيهم ميزة عننا ..

أحيانا أنا بدايق من شعور إن في حد أحسن مني .. أو بيفكر بطريقة أكتر منطقية عني ..

بس في حاجة حلوة قوي عرفتها .. إن مهما كان أي شخص .. فإنت في ميزة بتميزك عنه شخصيا ..

إيه دا يعني أنا فيا ميزة عن زويل مثلا ؟!!!

أيوا !!

زويل عالم و مفكر و منطقي و و و و و و ..

يمكن إنت مش فيك المميزات دي كلها ..

بس أكيد فيك مميزات تانية .. لو جينا نقارن بينك و بينه فيها إنت هتكسب ..َ!!

عشان متحقدش على حد .. فكرت في حاجة حلوة قوي ..

كل ما حد يقولك ميزة فيك .. اكتبها فورقة ..

و كل ما تُحبط .. أو تحس بحقد لحد ..افتح الورقة دي و اقراها ..

و قول في نفسك .. هوا أكيد مفهووش الي أنا في دا .. ربنا ادالو مميزات عشان إداني أنا كمان .. فدا هيشجعك تطور نفسك .. و تشجعوا يطور نفسه

و أكيد هتضحك و يومك هيحلوٌ

سادس بكرة

البراويز ..

مين معندوش برواز في بيته ؟!

بس في حاجة مشتركة في البراويز كلها .. إن الي متصور سواء بيضحك أو مكشر .. تحسو معندوش أي هموم .. صعب قوي تعرف إحساس المتصور دا من صورتو المحطوط في البرواز ..!!

وش جامد خالي من أي مشاعر ..

الصور ..

الصور دي أحلى حاجة في الدنيا .. من تجربتي مع البرواز .. قررت إني مقولش لحد قبل ما أصوروا .. بحب أخد كل الصور فجأة .. عشان كدا عندي صور للناس كلها الي بحبها في أوضاع مختلفة .. وضع السرحان .. وضح البكاء .. وضع التركيز .. وضع الهبل .. وضع الجنان .. وضع الضحك من القلب ..

بس الموضوع دا عملي مشكلة .. إني دايما حسا بالكاميرا .. محدش عارف ياخدلي صورة و أنا مش واخدة بالي ..

أعتقد لو حد خدلي الصورة دي .. يومي هيحلوَ

خامس بكرة

ساعات بصحى الصبح .. و بفضل عالسرير حبا كتير قوي .. بحاول أفتكر كنت بحلم بإيه ؟!

ياااااه لحقت أنسى الحلم الحلمته من شويا بسرعة كدا ؟!

افتكرت و أنا صغيرة قبل ما أنام كنت أقول يارب أحلم بأوضة طمطم .. كنت بحب أوضتها قوي .. و أنام أحلم بحاجة تانية .. و أصحى فاكرة حلمي و أروح أحكي لماما و صحابي ..

دلوقتي قبل ما أنام لا عرفا أنا حبَا أحلم بإيه انهاردة ؟! و لا حتى فاكره حلمت بإيه ؟!

طب .. هوا العيب في مين ؟!

ليه بقينا ننسى حاجات كتيرة في حياتنا و تفوتنا حاجات أكتر .. ليه حتى أحلامنا الي مش بنحلم بيها و احنا نايمين بس لا دا حتى الي بنحلم بيها في حياتنا بننساها ؟!

حصلنا إيه ؟! دا بإرادتنا و لا غصب عننا و لا إيه ؟!

بتمنى أصحي في يوم الصبح و أفتكر حلمي و أنا نايمة .. و أنا نزلا من بيتنا الصبح .. أفتكر حلمي الي بعمل عشانه كل حاجة في حياتي .. إلا بصحيح هوا كان إيه ؟!

رابع بكرة

الدنيا حوالينا جميلة قوي .. ساعات ربنا بيبتلينا ابتلاء يزعلنا شويا و يوجعنا .. بس في الآخر ربنا مش بيبتلينا إلا حبا فينا .. ساعات بقا بيكون ربنا مخليلنا الدنيا حلوة قوي بس إحنا الي عايزين و متخيلين إنها مش حلوة ..
الحكاية دي بتفكرني بحاجة بعملها ..
أنا مش بحب الحلويات قوي ... يعني مثلا بكلها كل فين و فين
القطايف بتتعمل إزاي ؟ بنجيب العجينة و نحط جواها بقا زبيب أو جوز هند أو قرفة و نقفلها من الجناب كويس بعدين نحطها في الزيت و نطلعها نستنى على ما تبرد و نحط الشربات بقا السخن ..
أنا بقا مش بحب الحلويات بس نفسي في القطايف .. بجيب لحمة مفرومة و أحطها جوا و بعدين أقفل الجناب و أحطها في الزيت و لما أطلعها أحط عليها صلصة بشاميل
في ناس بتحب القطايف و هي حلوة .. أنا بحبها و هي حادقة
في ناس لما تشفني باكلها كدا يقرفوا .. أنا لما بشوفهم بيكلوها حلوة بحس بوجع في حلقي :d
طب إيه الفايدة من فقرة الشيف حسن دي ؟!
كل واحد فينا الحلاوة في رأيو مختلفة عن باقي الناس
لو كلنا بنحب الحلويات مكنش حد فينا اكتشف طريقة نعمل بيها الحوادق .. و لو كنا كلنا بنحب الحوادق مكنش حد فينا اكتشف الحلويات ..  وقس على ذلك بقا كل حاجة فدنيتنا ..
كل واحد فينا حلاوة الحياة بنسبالو مختلفة عن التاني .. أنا حلاوة الدنيا بالنسبالي لما أكتب, غيري حلاوة دنيتو لما ينام واحد تالت حلاوة
دنيتو لما يتمشى واحد رابع لما يبقا قاعد في البلكونة يتتبع حياة الناس
الأوبشن الأخير دا بردو أنا بحبو :D ..
..
الحمدلله إن ربنا خلقنا مختلفين عشان كل واحد يستمتع في الدنيا بطريقة مختلفة .. وممكن و هو مستمتع يمتع ناس تانية كتير حواليه بفرحته و ضحكته
..
لو كنت مكتئبة قوي و شفت واحد بيضحك من قلبو قدامي .. يومي بيحلَو

تالت بكرة

سمعت صوت بكاء انهاردة .. طلعت في الصالة .. لقيت صوت أمي بتدعي ..
.. قعدت شويا كدا .. فكرت !! إيه السر فإن ربنا يخلي إنسان يحبنا كل الحب دا ؟! ليه أكون منكدة على ماما طول النهار و تشتمني و بليل تقول ربنا يهديكي يا بنتي .. إزاي في مخلوق في الدنيا بيحبني بالشكل دا؟! .. عشان ربنا كان عارف إننا ممكن نبقا عايشين في عالم  .. مليان جفاء و كراهية قوي كدا !!
فكرت ليه مش كل إنسان بنحبو بيحبنا ؟! أو مش شرط كل إنسان بنحبو بطريقة معينة يحبنا بنفس الطريقة دي ؟!
إيه هو الحب أصلا ؟!
الحب أيام زمان كان ليه معنى واحد بس .. كان معناه شعور جميل و صافي بين أي اتنين في الدنيا سواء أصحاب .. عشاق .. إخوات
الحب دلوقتي بقا ليه كذا مسمى .. لكذا هدف .. حب مصلحة .. حب تسلية .. حب تقضية وقت .. حب هبل .. حب عشان دي الموجودة .. حب عشان مليش صحاب عدلين و دي أحسن من مفيش
سمعت حاجة حلوة قوي إننا لما بروح ننام أرواحنا بتتشاقى و تروح تقابل أرواح تانية
يخراشي !!
طب أنا روحي بتقابل أنهي روح  بليل ؟! ينهار إسود
يعني روحي عارفة ناس تانية من ورايا ..!!
طب روحي بتقابل أرواح تانية طب بتختار صحابها الأرواح على أساس إيه ؟!
أنا عرفت دلوقتي ليه ممكن نكون نايمين مخنوقين قوي و ممكن نصحى تاني يوم عادي .. ليه ؟! ..
أصل روحك قابلت أرواح حلوة فرفشو عنها
و دا من الأسباب بردو الي ممكن تحلي يومنا :)

تاني بكرة

هل نتغير كلما كبرنا ؟! هل تضيع منا قيما و مشاعر ظننا أنها أساسية بداخلنا .. وأننا لن نفقدها أبدا .. ثم اكتشفنا أنها سقطت منا ... صدفة ؟! .. هل تغير أصدقاؤنا منذ كنا صغارا ؟! و تغيرت طريقتنا في اختيارهم ؟! زمان عشان نصاحب حد كنا نقولو إزيك عامل إيه و هو يقول الحمدلله .. بعد كدا أروح مالحضانة و أقول ماما أنا بقا عندي صاحب .
ليه اتغيرت فينا حاجات كتير .. و ليه صحابنا اتغير فيهم حاجات كتير حتى لو فضلو هما هما و معزتهم هيا هيا .. ليه و احنا صعيرين كنا بنحلم اننا هنجوز اتنين اخوات و أولادنا يتجوزوا بعض .. و دلوقتي بقا كل واحد فينا الدنيا واخدة في سكة ممكن علشانها ينسى مامتو مش صحابو ..
ليه كنا فاكرين ان الدنيا و احنا سوا هتحلو ..  واحنا لو اتجمعنا كل واحد فينا في دنيا غير التاني ..
في ناس زيي مش هيعرفوا ولا عارفين يعيشوا غير بأصحاب حواليهم .. بس للأسف الدنيا بقت مشاغل ..!!
 ..  قابلت صاحبة مقربة مني قوي انهاردة .. ورغم انه كان وحشني قوي الكلام معاها
بس حسيت ان أنا اتغيرت و حاجة مش عارفة ايه هيا اتغيرت جوايا .. و حسيت ان هيا اتغيرت و حاجة مش عارفة ايه هيا وقعت منها ..
رغم كدا أول ما هي روحت و أنا روحت ... وحشتني ..!!

أول بكرة ..!!

وقفت في البلكونة إنهاردة الصبح .. افتكرت إعلان فيلم بتاع بينلوبي كروز عشان هيا جميلة أوي لما تعدي جنب أي حاجة شكلها وحش تقوم تحلو .. يعني عدت جنب وردة دبلانة قامت فتحت .. و بما إن ماما دايما تقولي إنتي أجمل واحدة في الدنيا قولت يمكن لما أبص عالزبالة الي مرمية عالأرض تنقلب ورد .. و لا لما أبص عالرصيف المكسر هيتصلح لوحدوا .. بس من الواضح إن ماما كانت بتضحك عليَ ..!!
نفسي تغير حكاية الرمي في الشارع دي .. يعني هوا الزبال وظيفتوا إيه ؟! و الأسوأ كمان إني بشوف ناس وظيفتها إنها تفتح الزبالة و تشيل الأزايز البلاستيك منها ..!!
عمي حكالي على حاجة حلوة قوي بيعملوها في البرتغال .. بيحط في الشارع تلات علب زباله كبار كل واحدة ليها لون .. واحدة نرمي فيها حدة مش عارفة إيه الأزايز وواحدة الأكياس و واحدة حاجة تالتة مش فكراها .. الفكرة في إن هل فعلا لو طبقنا حاجة زي دي الناس هتتقبلها ؟! حسا إنها لو اتطبقت يوم ناس كتير قوي هيحلو ..!!